Մարդու իրավունքների պաշտպան Արման Թաթոյանն այսօր ընդունել է
Հայաստանում Գերմանիայի արտակարգ և լիազոր դեսպան Միխայել Յոհաննես Բանցհաֆին։
Արման Թաթոյանն առաջնահերթ բարձրացրել է Ադրբեջանում գերության
մեջ գտնվող հայկական կողմի զինծառայողների ու քաղաքացիական անձանց իրավունքներին և
նրանց անհապաղ վերադարձին առնչվող հարցեր։ Պաշտպանը դեսպանին տեղեկացրել է, որ
Ադրբեջանի իշխանություններն արհեստական ձգձգում են ինչպես պատերազմական
գործողությունների ընթացքում, այնպես էլ այդ գործողություններից առաջ ու դրանց
ավարտից հետո Ադրբեջանում գտնվող հայկական կողմի գերիների վերադարձի և զոհվածների
մարմինների փոխանակման գործընթացները:
Հանդիպմանը կողմերը քննարկել են նաև նոր կորոնավիրուսի
(COVID-19) համավարակի հիմքով Հայաստանում հայտարարված արտակարգ դրության, ինչպես
նաև գործող ռազմական դրության համատեքստում մարդու իրավունքներին առնչվող հարցերը:
Կարևորվել է համատեղ ծրագրերի իրականացումը հատկապես երեխաների
և կանանց իրավունքների պաշտպանության, ինչպես նաև լրագրողների կարողությունների
զարգացման ոլորտներում:
Հանդիպման ընթացքում կողմերը քննարկել են նաև մարդու
իրավունքների պաշտպանությանն առնչվող այլ հարցեր, մասնավորապես, Մարդու
իրավունքների պաշտպանը կարևորել է, որ ՀՀ քրեական և քրեադատավարական օրենսդրության
զարգացումների հիմքում ընկած են նաև գերմանական իրավական համակարգի հայեցակարգային
մոտեցումները:
Կողմերը պայմանավորվածություն են ձեռք բերել խորացնել
համագործակցության ուղղությունները։
English
