Մարդու իրավունքների պաշտպանի աշխատակազմի ներկայացուցիչներն Աղվերանում մասնակցել են Ռաուլ Վալենբերգի մարդու իրավունքների և մարդասիրական իրավունքի ինստիտուտի կողմից կազմակերպված երկօրյա աշխատաժողովին։

Աշխատաժողովի հիմնական նպատակն էր հաստատություններում հաշմանդամություն ունեցող անձանց իրավունքների մշտադիտարկման միասնական գործիքի մշակումը՝ միջազգային չափանիշների և գործնական մեթոդների հիման վրա։

Աշխատաժողովն անցկացրել է հաշմանդամություն ունեցող անձանց իրավունքների անկախ փորձագետ Մուշեղ Հովսեփյանը։

Աշխատաժողովի ընթացքում առանձնահատուկ ուշադրություն է դարձվել ինստիտուցիոնալացման հետևանքներին, ապաինստիտուցիոնալացման միջազգային չափանիշներին, համայնքում անկախ ապրելու և ներառվելու իրավունքին, ինչպես նաև մշտադիտարկման ընթացքում էթիկական սկզբունքների պահպանմանը։

Ի թիվս այլնի, քննարկվել են մշտադիտարկման այցերի պլանավորման և իրականացման, փաստաթղթերի ուսումնասիրության, հարցազրույցների անցկացման, ապացույցների արձանագրման և համապատասխան գործիքների կիրառման հարցերը։

Աշխատաժողովն ամփոփվել է գործնական առաջադրանքով, որի ընթացքում մասնակիցները կիրառել են քննարկված մեթոդներն ու գործիքները՝ մշտադիտարկման այցի տարբեր փուլերում։

Մարդու իրավունքների պաշտպանը կարևորում է հաշմանդամություն ունեցող անձանց իրավունքների պաշտպանության ոլորտում կարողությունների անընդհատ զարգացումը, առկա խնդիրների հասցեագրումը, մշտադիտարկման արդյունավետության բարձրացումն ու իրավունքների պաշտպանության մեխանիզմների շարունակական կատարելագործումը։