Սեպտեմբերի 25-ին Մարդու իրավունքների պաշտպանի աշխատակազմի ներկայացուցիչները մասնակցել են Եվրոպայի խորհրդի կողմից կազմակերպված «Սոցիալական իրավունքների եվրոպական կոմիտեին այլընտրանքային զեկույցների պատրաստման աշխատաժողով» թեմայով վերապատրաստման դասընթացին։

Դասընթացի նպատակն էր ամրապնդել Մարդու իրավունքների պաշտպանի աշխատակազմի կարողությունները այլընտրանքային զեկույց պատրաստելիս։

Դասընթացի բացմանը ողջույնի խոսքով հանդես են եկել ՀՀ մարդու իրավունքների պաշտպանի աշխատակազմի քաղաքացիական, սոցիալ-տնտեսական և մշակութային իրավունքների պաշտպանության դեպարտամենտի ղեկավար Վլադիմիր Հովհաննիսյանը, Եվրոպայի խորհրդի Սոցիալական իրավունքների վարչության համագործակցության բաժնի ղեկավար Մարգարիտա Գալստյանը և «Հայաստանում մարդու սոցիալական իրավունքների ամրապնդում» ծրագրի ղեկավար Մարիամ Ալեքսանյանը։

Հանդիպման ընթացքում Եվրոպայի խորհրդի միջազգային փորձագետ Ալլա Ֆեդորովան ներկայացրել է Եվրոպայի սոցիալական խարտիայի վերահսկման համակարգը․ վերջին բարեփոխումները և մարդու իրավունքների ազգային հաստատությունների հնարավորությունները։

Վերապատրաստման ընթացքում մասնակիցները քննարկել են այլընտրանքային զեկույցի պատրաստման համար ապացույցների հավաքագրմանը և տվյալների վերլուծությանը վերաբերելի այլ հարցեր։

Մարդու իրավունքների պաշտպանի հաստատությունը շարունակաբար իրականացնում է աշխատակիցների մասնագիտական կարողությունների զարգացման միջոցառումներ՝ կարևորելով շարունակական կրթությունն ու միջազգային լավագույն փորձի փոխանակումը՝ որպես մարդու իրավունքների պաշտպանության արդյունավետության բարձրացման կարևոր նախապայման: