2026 թվականի սեպտեմբերի 8-ին Մարդու իրավունքների պաշտպանի աշխատակազմի Կոնվենցիոն մանդատների ապահովման վարչության ներկայացուցիչներն իրազեկման այց են իրականացրել «Ալեքսանդր Շիրվանզադեի անվան թիվ 21 հիմնական դպրոց» ՊՈԱԿ։

Այցի շրջանակում Դպրոցի սաներին և անձնակազմի ներկայացուցիչներին ներկայացվել են Մարդու իրավունքների պաշտպանի լիազորություններն ու գործունեության հիմնական ուղղությունները, ինչպես նաև Պաշտպանին դիմելու հնարավոր եղանակները։

Հայաստանում հոկտեմբերին կայանալիք ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովին (COP17) ընդառաջ առանձնահատուկ անդրադարձ է կատարվել երեխաների՝ մաքուր, առողջ և կայուն շրջակա միջավայրում ապրելու իրավունքին և դրա ապահովման կարևորությանը։

Հանդիպման ընթացքում քննարկվել են նաև երեխաների անձնական տվյալների պաշտպանության, թվային միջավայրում երեխաների անվտանգության, երեխայի նկատմամբ բռնության, այդ թվում՝ բուլինգի և կիբերբուլինգի կանխարգելմանն ու արձագանքմանը, երեխայի աշխատանքային իրավունքի պատշաճ ապահովմանը, ինչպես նաև առողջ ապրելակերպի խթանմանն ու առողջությանը վնասող սովորությունների կանխարգելմանն առնչվող հարցեր։

Մարդու իրավունքների պաշտպանի հաստատությունը շարունակում է իրազեկման այցերը հանրակրթական ուսումնական հաստատություններ՝ նպատակ ունենալով բարձրացնել երեխաների և հաստատությունների աշխատակիցների իրազեկվածությունն իրենց իրավունքների, ինչպես նաև դրանց պաշտպանության հասանելի մեխանիզմների վերաբերյալ։