ՄԻՊ հաստատության միջազգային համագործակցության վարչության պետ Ռուբինա Լալայանը, Պաշտպանի օգնական Կլարա Հովհաննիսյանը, Զինծառայողների և նրանց ընտանիքների անդամների իրավունքների պաշտպանության բաժնի պետ Վանուհի Կարապետյանը և Հետազոտական, փորձագիտական և կրթական կենտրոնի ավագ մասնագետ Դիանա Գրիգորյանը մասնակցել են Կարմիր խաչի միջազգային կոմիտեի և Հայաստանում ամերիկյան համալսարանի կողմից համատեղ կազմակերպված մարդասիրական միջազգային իրավունքի տարածաշրջանային 10-րդ ամառային դպրոցին։

Ծրագրի ընթացքում մասնակիցները ծանոթացել են Ժնևյան կոնվենցիայի պատմությանն ու հիմունքներին, մարդասիրական դիվանագիտության և միջազգային մարդասիրական իրավունքի կիրառելիությանը խաղաղաշինական գործընթացներում և

զինված հակամարտություններում։ Մասնակիցներին նաև ներկայացվել են Միջազգային մարդասիրական իրավունքի խախտումների և ռազմական հանցագործությունների էությունը։

Մասնակիցներն ունկնդրել են միջազգային իրավունքի մասնագետների և արտերկրից ժամանած մի շարք փորձառու դասախոսների դասախոսություններ, մասնակցել ինտերակտիվ խաղերի և Ժան-Պիկտեի միջազգային մարդասիրական իրավունքի դատախաղի մրցույթին (Pictet Moot Court Competition on IHL)։

Մարդու իրավունքների պաշտպանը մշտապես կարևորում է դասընթացներին, վերապատրաստումներին և աշխատաժողովներին ՄԻՊ աշխատակազմի ակտիվ մասնակցությունը։