Մարդու իրավունքների պաշտպանի աշխատակազմի հետազոտական, փորձագիտական և կրթական կենտրոնի ղեկավար Ժաննա Հակոբյանը 2026 թվականի նոյեմբերի 4-ին և 5-ին Իռլանդիայի մայրաքաղաք Դուբլինում մասնակցել է «Եվրոպայի օրակարգի հիմքում երեխաների իրավունքները։ Երկխոսություն Երեխաների հարցերով օմբուդսմանների եվրոպական ցանցի (ENOC) հետ» խորագրով միջոցառմանը։

Միջոցառման ընթացքում քննարկվել են երեխաների իրավունքների պաշտպանության ներկա վիճակին ու առկա մարտահրավերներին առնչվող հարցեր, քաղաքականություններում երեխայի իրավունքների առաջնահերթության ներառման հետ կապված խնդիրները։ Առանձնահատուկ ուշադրություն է դարձվել արհեստական բանականության և միգրացիոն գործընթացների ազդեցությանը երեխաների իրավունքների վրա։

Միջոցառման ընթացքում Մարդու իրավունքների պաշտպանի աշխատակազմի հետազոտական, փորձագիտական և կրթական կենտրոնի ղեկավար Ժաննա Հակոբյանը ներկայացրել է Հայաստանի Հանրապետության Մարդու իրավունքների պաշտպանի հաստատության լավագույն փորձը երեխայի իրավունքների պաշտպանության ոլորտում։ Հատուկ անդրադարձ է կատարվել Մարդու իրավունքների պաշտպանի ամենօրյա գործունեության ընթացքում երեխայի ձայնը լսելի դարձնելու մեխանիզմներին ու ոլորտում արձանագրված հաջողություններին։

Երեխայի իրավունքների պաշտպանությունը Մարդու իրավունքների պաշտպանի առաջնահերթություններից է։ Մարդու իրավունքների պաշտպանը կարևորում է հաստատության ներգրավվածությունն ու ակտիվ մասնակցությունը ինչպես ներպետական, այնպես էլ միջազգային հարթակներում երեխայի իրավունքների պաշտպանությանն առնչվող հարցերում։

Միջոցառմանը մասնակցության հարցում աջակցել է ՄԱԿ-ի Մանկական հիմնադրամը (ՅՈՒՆԻՍԵՖ)։