Մարդու իրավունքների պաշտպանի աշխատակազմի հետազոտական, փորձագիտական և կրթական կենտրոնի ղեկավար Ժաննա Հակոբյանը 2026 թվականի սեպտեմբերի 17-18-ը մասնակցել է Բեռլինում տեղի ունեցած Մարդու իրավունքների ազգային հաստատությունների եվրոպական ցանցի (ENNHRI) տարեց մարդկանց իրավունքների պաշտպանության հարցերով աշխատանքային խմբի երկօրյա հանդիպմանը։

Հանդիպման նպատակն էր քննարկման առարկա դարձնել ՄԱԿ-ի Մարդու իրավունքների խորհրդի Միջկառավարական աշխատանքային խմբի (IGWG) կողմից տարեց մարդկանց իրավունքների խթանման և պաշտպանությանն ուղղված իրավաբանական պարտադիր ուժ ունեցող փաստաթղթի մշակման աշխատանքներին մարդու իրավունքների ազգային հաստատությունների ներգրավման, տարեց մարդկանց իրավունքների պաշտպանության նպատակով մարդու իրավունքների ազգային հաստատությունների կողմից կիրառվող մեթոդաբանության հետ կապված հարցերը և այլն։

Հանդիպման ընթացքում Մարդու իրավունքների պաշտպանի աշխատակազմի հետազոտական, փորձագիտական և կրթական կենտրոնի ղեկավար Ժաննա Հակոբյանը ներկայացրել է Հայաստանի Հանրապետության Մարդու իրավունքների պաշտպանի հաստատության լավագույն փորձը տարեց մարդկանց իրավունքների պաշտպանության ոլորտում։ Հատուկ անդրադարձ է կատարվել Մարդու իրավունքների պաշտպանի ամենօրյա գործունեության ընթացքում նրանց ձայնը լսելի դարձնելու մեխանիզմներին ու ոլորտում արձանագրված հաջողություններին։

Հանդիպման արդյունքներն ամփոփվելու են և ներառվելու են Մարդու իրավունքների ազգային հաստատությունների համար աշխատանքային խմբի կողմից մշակվող ուղեցույցում։

Տարեց մարդկանց իրավունքների պաշտպանությունը Մարդու իրավունքների պաշտպանի առաջնահերթություններից է։ Մարդու իրավունքների պաշտպանը կարևորում է հաստատության ներգրավվածությունն ու ակտիվ մասնակցությունը ինչպես ներպետական, այնպես էլ միջազգային հարթակներում տարեց մարդկանց իրավունքների պաշտպանությանն առնչվող հարցերում։