Մարդու իրավունքների պաշտպան Անահիտ Մանասյանն օգոստոսի 2-ին մասնակցել է «Ճախրուկ» ամենամյա միջազգային 6-րդ հոբելյանական փառատոնին։

«Ֆիզիկական հնարավորությունները ոչինչ են, եթե չունես հոգու թռիչք» կարգախոսով միջոցառումը, որի հիմնադիրներն են երաժիշտ քույրեր Աննա և Անահիտ Մխիթարյանները, այս տարի անցկացվել է Լոռու մարզի Օձուն գյուղում` «Կամերային երաժշտության ազգային կենտրոն» ՊՈԱԿ-ի, նրա կազմում գործող Երևանի պետական կամերային երգչախմբի և Հնագույն երաժշտության «Տաղարան» համույթի հետ համագործակցությամբ։

Փառատոնին մասնակցել են հատուկ կարիքներ ունեցող անձանց խմբեր և անհատ կատարողներ Ղազախստանից և Մարոկկոյից, Հայաստանի մասնագիտացված մանկատներից, խնամքի կենտրոններից, հատուկ կրթահամալիրներից և այլ հաստատություններից:

Իր խոսքում Անահիտ Մանասյանը կարևորել է նման ձևաչափով միջոցառման անցկացումը.

«Յուրաքանչյուրը պետք է ունենա իր ներուժը բացահայտելու և իր երազանքներին հասնելու հավասար հնարավորություն։ Մեզանից յուրաքանչյուրն էլ պետք է անի իրենից կախված ամեն ինչ` համերաշխ ու բոլորի ներուժի բացահայտման հնարավորություններ ստեղծող հասարակություն ձևավորելու նպատակով: Միայն միասին կարող ենք ձևավորել այնպիսի միջավայր, որտեղ յուրաքանչյուրը կզգա, որ արժևորված է և իր ներուժն` իրացված», – նշել է Անահիտ Մանասյանը։

Պաշտպանը հատուկ շնորհակալություն է հայտնել միջոցառման կազմակերպիչներին և այն բոլոր մասնագետներին, ովքեր մեծ նվիրումով են աշխատում հաշմանդամություն ունեցող անձանց հետ և նպաստում նրանց համար իրավահավասար միջավայրի ձևավորմանը: Անահիտ Մանասյանը նաև ընդգծել է, որ առանձնահատուկ հարգանքի են արժանի այն ծնողները, ովքեր մեծ սիրով և նվիրումով իրականացնում են բազմաթիվ մարտահրավերներ ենթադրող` հաշմանդամություն ունեցող իրենց երեխաների խնամքն ու դաստիարակությունը` հատուկ շեշտադրելով նրանց խիզախությունը:

Պաշտպանը վստահեցրել է, որ ՄԻՊ հաստատությունը շարունակելու է իր մանդատի շրջանակներում պաշտպանել ու խթանել հաշմանդամություն ունեցող անձանց իրավունքները։