ՀՀ մարդու իրավունքների պաշտպանի աշխատակազմի ներկայացուցիչները հուլիսի 31-ին Քրեակատարողական ծառայությունում մասնակցել են աշխատանքային քննարկման։

Հանդիպումը կազմակերպվել էր Մարդու իրավունքների պաշտպանի կողմից ՀՀ ԱՆ «Աբովյան» և «Արթիկ» քրեակատարողական հիմնարկներում մշտադիտարկումների արդյունքում արձանագրված խնդիրները և դրանց լուծման առաջարկները քննարկելու նպատակով։

Քննարկմանը մասնակցել են ՄԻՊ աշխատակազմի կանխարգելման ազգային մեխանիզմի իրականացման համակարգող-խոշտանգումների և վատ վերաբերմունքի կանխարգելման վարչության պետ Լաուրա Գասպարյանը, Քրեակատարողական ծառայության պետ Ծովինար Թադևոսյանը, Ծառայության պետի տեղակալ Վահե Նանուշյանը, «Աբովյան» քրեակատարողական հիմնարկի պետ Հեղինե Մարտիրոսյանը, «Արթիկ» քրեակատարողական հիմնարկի պետի պարտականությունները կատարող Կարո Մանուկյանը, ՄԻՊ աշխատակազմի և կենտրոնական մարմնի ներկայացուցիչները:

Հանդիպման ընթացքում անդրադարձ է կատարվել մշտադիտարկման արդյունքում արձանագրված յուրաքանչյուր խնդրի, այդ թվում՝ ազատազրկված անձանց` արտաքին աշխարհի հետ կապի ապահովման,վերասոցիալականացման գործընթացների հետ կապված և մի շարք այլ հարցերի։  Հատուկ ընդգծվել են ազատությունից զրկված կանանց, նրանց հետ գտնվող մինչև 3 տարեկան երեխաների և ազատությունից զրկված անչափահաս անձանց իրավունքներին առնչվող հարցերը, մասնավորապես, վերաբերելի երեխաների բժշկական օգնությանն ու սպասարկմանը, անչափահասների նկատմամբ հատուկ միջոցների կիրառմանը և այլն:

Պաշտպանի ներկայացուցիչներին  ներկայացվել են արդեն իսկ նախաձեռնված առանձին լուծումներ, քննարկվել են դեռևս առկա խնդիրների լուծման ուղիները:

Քննարկման մասնակիցները հաստատել են իրենց պատրաստակամությունը՝ շարունակելու նման ձևաչափով հանդիպումները` ընդգծելով դրանց արդյունավետությունը արձանագրված խնդիրներին արագ արձագանքելու և համատեղ լուծումներ գտնելու տեսանկյունից։

Մարդու իրավունքների պաշտպանը հատուկ ընդգծում է, որ ազատությունից զրկված կամ այլ կերպ պետության իրավասության ներքո գտնվող անձանց իրավունքների ապահովման համար պետությունը կրում է պատասխանատվություն:

Ազատությունից զրկման վայրերում մարդու իրավունքների ապահովման հարցերը մշտապես գտնվում են Մարդու իրավունքների պաշտպանի անմիջական ուշադրության ներքո: